Ilahleko

Lendlel'ibenzima
Ndasisibhadu-bhadu,
Esibhadula nje ndingaboni nalondlela.
Lonto
Ingqiqo yam,ubom bam
Bushiy'ilahleko..................x2

Bendilithemba kwimbedlenge zasemathileni,onk'amehlo abo bewaphose kum
Ukusuka komnci,uyokutsho kwingwevu,

Wazithengisa zonk'utat'inkomo zakhe,

wagqibelis'umama ngaleyo ebeyibekel'ukutheng'into yokuty'ekhaya.

Ndandizibazil'indlebe ndixel'unogwaj'entsimini esib'umnqatha,
Ndabe ndisondliwa ngomphak'ongamazwi obulumko.

Ndalishiy'ikhaya,ndibon'ikamv'eliqaqambileyo.
Ndabathembisa ngokufezekisa yonk'iminqweno yabo.

Owu!! Ndathi ndingekalifezi nogqatso,
Andikhwaz'amakhwelo,savulek'isiziba
Ndoyela kwilahleko.
Yemka nomsing'imali yenkomo zikatata.
Tshini abhang'aphela nya..........
Nditsho onk'amaphuph'am
Okwezithuku-thuku zenja zona
Ezo ziphelel'eboyeni.

Ndabon'izinto ngoluny'uhlobo,ndatabhata
ndazibona ndisegcibhala.
Yaqal'intombi yamamel'amantyontyelw'abahlobo.
Yawunguzelelwa ngamadod'okwenyosi kwintyatyambo zehlobo.

Atshitsh'amaphuph'omfana,
Waqala ngotywala.
Waziqamangela ngeziyobisi,
Leyo ke yayimbopheleleko yomphefumlo,
Ingqamangelo zemiqokozo edal'ukufa.

Owu zemka namanz'inkomo zikatata,
Kuba mna njengalentombi ndiyiyo,
Mna nje ngalomfana ndinguye ,ndiphambukil'emendweni.

Ndithe ndazophula intliziyo ezazizele ithemba,
Uncanyelweni yaligama lam labumini,
Isidladlayiya sendlavini,
Baphel'ubuntombi bam,isidima sam sobufana sabhangaaaaaaa.

Owu ingathi ndiyambon'umzali xa engalali
Edliwa,yintlungu,nentlupheko.
Ejike yasisityalw'esiqham'ameva
Kwintliziyo yakhe.
Amehlo akh'ezele inyembezi.
Ngenxa yam,nawe.

Khawuqiqe mntomtsha,ulaqaze
Zonk'intunja ezinokuthi ziyibangel'uziko lalenqanawe.
Phil'amaphuph'akho,ungalali kuwo,
Kuba hlez'uzalel'amaqand'abolileyo.

Masiwonyuke ntozakuthi lomnqantsa walendlela yobubom,
Siwuthwale nokuba uyasinda lomnqamlezo.

Kuba ngaphaya kweliqhina kuyehlela,
Ngaphaya kobubumnyama kuyakhanya.
Umzingisi akanashwa,
Masizingiseni,siziphothule kuko konk'okungendawo.

Kubechosi,kubehele.kuded'ubumnyama kuvel'ukukhanya.
Camagu! Ndaba zolwimi
Andibalisi ntsomi