saphel'isizw'esintsundu
Sibheka phi na isizwe?
Lo ngumbuzw'endiwutya ndiwulale ,
kodw'andifumani mpendulo.
Alwil'amagokra elwel'inkululeko,
liphalel'igazi lomzontsundu,kufelw'isizw'esintsundu.
Bayifumene lonto abathe bayibiza
ngokuba yinkululeko
Kodw'andiboni nkululeko ngaphandle
kwentandabuzo.
Inkululekw'eshiy'imimangaliso,
mimangalisw'edalimibuzw'engenampendulo.
Sixhamli cham lenkululeko,
lade laxhamla thina.
Lwaphel'ulutsh'oluntsundu,
ngenxa yenkululeko.
Nkululeko leyo ithe yazal'amalungelo,
malungelo ango sithi siwasebenzise siwabaxa.
Afikil'amalungelo esiza nenkululeko,
akrazul'aqweng'abulal'umzontsundu.
Bafik'othixo basemhlabeni,
bayibek'imithetho enxamnye naleyo yasekwa ngulowo wasidalayo
mithetho leyo isenze saphambuk'emendweni,.
Saphel'isizw'esintsundu
yinkululekw'ezal'amalungelo.
Zazalisan'inkedama,
zizal;abantwana benkululeko,
abantwan'abangacetywanga .
Wabhubhis'ugawulayo eligqib'ulutsha
lakowethu.
Yaphel'imbeko kuba siyazi silwelwa
ngamalungelw'azalwe yinkululeko.
Zikhulintsana zisazana namalungelo
nto leyo ibangel'ubunzima kuqeqesho labazali,
bave xa besithi
"Indukw'ayinamzi,ndiyokubambisa kuba ulwa nelungelo lam"
Nto leyo ibangel'ukuba babengophuncuka bemphethe
ababhek'ekufeni.
Kodwa kunjalo amil'amagqobhoka ngedolo,
athi"Uze usilwele thina zicaka zakho,khanyisa wena Thixo wethu,
sibonis'indlela kuba siyaphela isizw'esintsundu"
Saphela,Saphela,Saphel'isizw'esintsundu!!!!!
umbongo ngokubhalwa ngu Cebo....